Ang bawat assessments at activities na inilalapag ay napakahalaga sapagkat ang mga ito ang pinakapagkukunan ng iyong mga marka sa subjects lalo na ngayong tayo’y nasa online set up.
Kaya’t simulan nang magbanat-banat dahil narito ang ilan sa aking mga natutunan at napagtanto na dapat ay aking ginawa para sa aking assessments at activities.
Una, makinig at magbasa. Makinig mabuti sa lessons na itinuturo ng inyong professor at basahin ang mga ibinigay na modules o learning materials. Unawaing maigi ang mga ito upang mayroon kang maisagot sa iyong mga gawain.
Pangalawa, magsulat. Laging mag-take notes sa lectures at consultations dahil maaaring may mali o may mabago sa instructions para sa assessments at activities.
Pangatlo, manaliksik. Maghanap ng references sapagkat ito’y kinakailangan sa activities at bahagi ng criteria. Makatutulong din ito upang mas maunawaan ang mga lesson.
Pang-apat, magbahagi. Ito ang madalas kong nakakaligtaan sa aking pagbibigay ng sagot sa assessments. Dapat ay lagi mong ihanda ang iyong mga karanasan. Sa pagsasagawa ng assessments, makatutulong sa iyong pagbuo ng sagot ang pagbabahagi ng iyong mga karanasan patungkol sa aralin na tinalakay.
Panglima, maging maagap. Umpisahan agad ang mga gawain upang hindi mo ito pagsisihan. Hangga’t maaari ay pilitin ang sarili na huwag mag-procrastinate at huwag pasanay sa cramming upang hindi matambakan at magkaroon ng maayos na gawa.
Handa ka na ba? Aba’y dapat lang.
Nawa’y makatulong ang tips na ito sa iyo at sa aking sarili sa hinaharap upang kahit papaano’y maging madali ang ating mga gawain.